ಮನೆ ಮನೆ ಮುಸುರೆ ತಿಕ್ಕುವ ಕಾಯಕದಲ್ಲಿರುವ ವಿದ್ಯಾರ್ಥಿ ವರ್ಷಾ ತಳವಾರ ಪಿಯು ಪರೀಕ್ಷೆಯಲ್ಲಿ ಕಾಲೇಜಿಗೆ ಪ್ರಥಮ ಸ್ಥಾನ ಪಡೆದಿರುವದು.

ಮನೆ ಮನೆ ಮುಸುರೆ ತಿಕ್ಕುವ ಕಾಯಕದಲ್ಲಿರುವ ವಿದ್ಯಾರ್ಥಿ ವರ್ಷಾ ತಳವಾರ ಪಿಯು ಪರೀಕ್ಷೆಯಲ್ಲಿ ಕಾಲೇಜಿಗೆ ಪ್ರಥಮ ಸ್ಥಾನ ಪಡೆದಿರುವದು.

ಮನೆ ಮನೆ ಮುಸುರೆ ತಿಕ್ಕುವ ವಿದ್ಯಾರ್ಥಿಗೆ ಕೆಎಎಸ್ ಕನಸು

*ಬಡತನ ಹಾಸಿ ಹೊಚ್ಚಿ ಮಲಗಿದ ಕುಟುಂಬದ ವಿದ್ಯಾರ್ಥಿ ಕಾಲೇಜಿಗೆ ಪ್ರಥಮ

-ಮಲ್ಲಿಕಾರ್ಜುನ ತುಂಗಳ

ರಬಕವಿ-ಬನಹಟ್ಟಿ,ಜು17: ಕಿತ್ತು ತಿನ್ನುವ ಬಡತನ ತಂದೆ ಗೌಂಡಿ ಕೆಲಸಕ್ಕೆಂದು ತೆರಳಿದರೆ ತಾಯಿ ಅಲ್ಲೋ ಇಲ್ಲೋ ಮನೆ ಮನೆಗೆ ತೆರಳಿ ಭಾಂಡೆ, ಕಸಗುಡಿಸುವ ಮೂಲಕ ತುತ್ತಿನ ಚೀಲ ತುಂಬಿಸಿಕೊಳ್ಳುವ ಕುಟುಂಬ ಈ ಕುಟುಂಬದ ನೊಗಕ್ಕೆ ಸಹಾಯಕಳಾಗಿ ಬಾಲ್ಯದಿಂದಲೂ ತಾಯಿಯ ಕೆಲಸಕ್ಕೆ ನೆರವಾಗುವದರೊಂದಿಗೆ ಪಾಠ ಕಲಿಯುವ ವಿದ್ಯಾರ್ಥಿ ಸದ್ಯ ಕಾಲೇಜಿಗೆ ಪ್ರಥಮ ಸ್ಥಾನ ಪಡೆದಿರುವದು ಅಚ್ಚರಿ ಮೂಡಿಸುವಂಥದ್ದು.

ಬನಹಟ್ಟಿಯ ಸರ್ಕಾರಿ ಪ್ರೌಢಶಾಲೆಯಲ್ಲಿ ವ್ಯಾಸಾಂಗ ಮಾಡುತ್ತಿರುವ ಪಿಯು ವಿದ್ಯಾರ್ಥಿ ಗೊಲ್ಲರ ಓಣಿಯ ನಿವಾಸಿ ವರ್ಷಾ ಭೀಮಪ್ಪ ತಳವಾರ ಈ ಬಾರಿಯ ದ್ವಿತೀಯ ಪರೀಕ್ಷೆಯಲ್ಲಿ ಶೇ.90 ರಷ್ಟು ಅಂಕ ಗಳಿಸುವ ಮೂಲಕ ಕಲಾ ವಿಭಾಗದಲ್ಲಿ ಪ್ರಥಮ ಸ್ಥಾನ ಪಡೆದಿದ್ದಾಳೆ.

ಕನ್ನಡ-96, ಅರ್ಥಶಾಸ್ತ್ರ-97, ಇತಿಹಾಸ-90, ಸಾಮಾನ್ಯ ವಿಜ್ಞಾನ-94, ಸಮಾಜ ಶಾಸ್ತ್ರ-92, ಇಂಗ್ಲೀಷ್-68 ಅಂಕದೊಂದಿಗೆ 537 ಅಂಕ ಪಡೆದಿದ್ದಾಳೆ. 

ಅಧಿಕಾರಿಯಾಗುವಾಸೆ: ಬಿ.ಎ. ವ್ಯಾಸಾಂಗದ ನಂತರ ಉನ್ನತ ವ್ಯಾಸಾಂಗ ಮಾಡುವ ಮೂಲಕ ಸರ್ಕಾರಿ ಅಧಿಕಾರಿಯಾಗುವ ಕನಸನ್ನು ಹೊತ್ತಿರುವ ವರ್ಷಾ ಕೆಎಎಸ್ ಪರೀಕ್ಷೆ ಬರೆಯುವ ಬಯಕೆಯಿದೆ. ವ್ಯಾಸಾಂಗಕ್ಕಾಗಿ ಸಹಾಯ ಮಾಡಲಿಚ್ಛಿಸುವವರು 94488-89482 ನಂಬರ ಸಂಪರ್ಕಿಸಿ ಸಹಾಯ ಮಾಡಬಹುದು.